絲絲講場：李寧新日籍CEO原來係華人
李寧（02331）由創辦人「體操王子」李寧本人做代理行政總裁，代咗近四年半，如今終於搵到新CEO！公司周一宣布，委任之前喺南韓UNIQLO做CEO嘅高坂武史，做聯席行政總裁及執行董事，即日生效。
高坂曾任職迅銷
呢位高坂係就係日籍，但並唔係日裔，查實佢係華人，原名錢煒，畢業於日本關西學院大學，現年48歲。佢九六年加入UNIQLO母公司迅銷（06288），於該公司不同部門及多個亞洲地區工作過，之後分別於○一年及○五年出任中國UNIQLO嘅副總經理及首席運營官。
王子做代理CEO呢四年幾來，記者問親幾時請到新CEO，王子就呻「始終CEO唔係咁易變出來，要啲緣分」。嗱！今時終於緣分到，王子係咪可以鬆一鬆？照睇就唔會嘞，事關王子同時會調任，同高坂一齊做公司聯席行政總裁。兩人點分工？王子就係「集團總體把控及策略規劃，繼續與管理團隊一起領導公司的經營發展」，高坂工作重點就係「集團運營方面」。
腳頭好 股價急升
計絲絲話，做人嘅嘢，先唔講實力，淨是腳頭好就已經贏晒。高坂一嚟，公司股價尋日最多飆近5%，高見24.3元，創近九年盤中新高，收市仍升4.75%，報24.25元。公司市值單日升25.39億元，相比下，高坂嘅聯席行政總裁年薪千萬元人仔濕濕碎啦！
余絲韻