香港政治事件未見解決迹象，反有愈演愈烈趨勢。當然，中美貿易戰近期稍為降溫，令美股略作反彈，但港股氣氛都仲係差；相反，若然認為港美兩地股市前景都睇唔通透的話，投資落美股身上，就始終多咗份揸美元的保障，安全感都大少少。
睇番今日已經係九月第一個交易日，但回顧恒指整個八月累跌逾二千點，加上50日線已確認跌穿250日線，走勢差到冇朋友，故策略上應將重點放在「守」字上。
從基本面睇，指數睇落未跌完，大部分藍籌都唔攪得，好似上星期五見三桶油均發力反彈，但又係十萬個「莫沾手」，何解？
首先，環球經濟受中美貿易戰拖累，美國長短債息倒掛引發衰退憂慮，試問在經濟前景唔多明朗下，油價又會升得幾多？此外，市場避險需求持續上升，美元就算受累減息因素，但中線都仲係受避險需求推動而變得好硬淨，咁相對以美元計價的油價，若然要大升就難上加難。睇番紐約期油近月僅在53至57美元間上落，已難以復見60美元，反覆向下之勢未停，咁油價又點會抽得起？
其次，部分石油股近期都公布業績，但大行睇法就一般，好似中石油（00857）截至六月底止收入按年增6.8%至1.19萬億元人民幣；盈利按年增3.5%至284.23億元人民幣。大行里昂在報告指，該股上半年業績表現不佳，主因下游業務疲弱抵銷勘探及生產業務盈利，而天然氣及管道業務，亦受到進口天然氣損失較預期大所拖累，故就算估值便宜，仍將其目標價下調至5元，惟重申「買入」評級。
在股價走勢上，中石油、中海油（00883）及中石化（00386）上周升幅介乎1.3至5.4%，但全部臨近尾市升幅都見收窄，加上三隻個股於日線圖上皆拾級而落，走勢利淡，因此只能視為技術性反彈，中線買入值博率仍然低。
古勝