絲絲講場：虛擬幣商踩過界 炒埋波鞋

交易App估值達78億

內地部分波鞋交易App，好似毒App、nice App、DoNew鬥牛App等等，經過風投基金融資後，估值竟高達6億至10億美元（約46.8億至78億港元）不等，其交易規模仲拍得住內地三大比特幣交易平台嘅OKEX、幣安和火幣，都咪話唔厲害。

近日，一款名為Air Jordan 1 Retro High Satin Black Toe嘅女士紅絲綢波鞋，開售價1,299元（人民幣‧下同），但喺四日之內，炒價升到5,800元至12,000元，同波鞋本身嘅售價相比，升幅約3.4至8.2倍。有內地波鞋炒家受訪時更宣稱月賺過百萬元添！

提供行情及實時交易

炒波鞋咁好賺，開始引起內地主要比特幣交易商關注，因佢哋擔心客戶可能轉咗去炒波鞋，於是索性撈埋炒波鞋平台，提供波鞋行情及進行實時交易，仲有行情分析等等，務求留住炒虛擬貨幣嘅客戶，以至吸納新客源。

好似幾大虛擬貨幣交易商之一嘅CoinEx，其展示嘅波鞋交易頁面顯示，炒幣者使用比特幣炒波鞋嘅最新報價。喺呢度，你有幾多對波鞋，同你有幾多個比特幣、幾多人民幣存款一樣，都被視為財富嘅象徵。據講，另一比特幣商BIONE剛剛亦宣布加入炒波鞋平台服務添。睇嚟炒波鞋比起炒比特幣更加有錢途！

余絲韻