Market Insight:慎防地產股彈散格

本來港股面對中美貿易戰及內在政治事件影響,已經無運行,但隔晚美國十年及兩年長短債息倒掛,美國經濟衰退近在眼前,就算港股昨日意外地先跌後彈,都不可斷言港股短期見底,因基本面未見改善,就算跌停都未必代表大彈。

內銀弱 中銀失守3元關

近日一眾內銀股唔係好得幾多,好似兩隻鑊氣較濃的內銀股,工商銀行(01398)及建設銀行(00939)股價級級落,走勢衰到爆,而一向行得最慢的中國銀行(03988)亦失守3元關,不過,相對滙豐控股(00005)及恒生(00011)等,內銀股亦有中國在背後支撐,但所謂有得必有失,就正正是「國家」兩字,未來內地經濟及微小企業有乜大鑊,又要叫內銀背起重任,內銀壞帳率都唔知要升到甚麼水平,所以講到尾,現時無論係乜銀行股,今轉都係掂唔過!

再睇本地地產股昨日難得威水,主要是早前股價累跌多時後,多家地產企業齊齊出來發聲表態,希望香港盡快恢復平靜,「歸隊」之心路人皆見,加上美國經濟衰退,美國或提速減息,據資料顯示市場預期美國九月中減息0.5厘的機會率,從一周前的17.7%,急增至昨日執筆時的28.1%,地產股反彈確實有因。

不過,反彈歸反彈,若環球經濟以至未來經濟不樂觀,就算本地樓市真係唔大跌,但要再升又談何容易,大家睇睇隻最有防守力的領展(00823)及港鐵(00066)昨日股價均大彈4%,但中線轉弱趨勢明顯,咁同經濟息息相關的地產股仲博定唔博?真係見仁見智!

古勝