絲絲講場：「九號機器人」半隻腳檻入科創板
上海科創板申請上市的公司一浪接一浪，喺四月中已遞表申請嘅九號機器人公司(Ninebot)，終於獲上交所受理上市申請。
首間境外註冊 集資20億
九號機器人（以下簡稱九號）係科創板受理唯一喺境外開曼群島註冊嘅中資企業，亦都係擬發行CDR（中國存託憑證）嘅首隻紅籌股，集資20.77億元人民幣。
一二年成立嘅九號，最威水係被市場稱為「山寨買下原創」嘅一役，該公司喺一五年四月時，宣布全資收購咗美國平衡車廠商賽格威（Segway）。
九號收購賽格威時，獲小米集團（01810）董事長雷軍牽頭注資8千萬美元，成小米生態鏈一員。兩年後，九號完成1億美元融資，估值逾15億美元，去年營業額逾24億人仔。家陣九號專注短途交通與服務類機械人研發、生產，已成型產品包括智能電動平衡車、智能電動滑板車、智能服務機械人等。
余絲韻