Market Insight：招金產量看升等落鑊

從近期環球多間大行減人手，以及環球息率反覆回落，再加埋中美貿易戰前景未明可見，其實好多因素應有利公用及收息股等傳統防守型板塊，但大家睇睇隻最炒得的領展（00823），基金價格已五連跌，周線圖更自去年十一月以來首次跌穿10周線，走勢利淡之餘，更反映部分保守型投資者亦覺得領展等收息股已不再吸引！唔信？大家睇埋隻中電（00002）、電能實業（00006）及港鐵（00066）走勢，全部唔係升唔起，就係已經回軟。

當炒板塊已買少見少

若然再配合埋近期恒指僅在28,000至29,000點間反覆上落，但恒指波幅指數從七月中近14，反覆升至上周五的18.08，暗示後市爆邊機會增加，資金卻連防守股都唔願再落注的情況下，相信後市回落的機會較大！

當然，騰訊（00700）、醫藥股及物管股中線前景仍然不弱，但好似中資汽車股咁，一個中汽協下調全年汽車銷售預測消息打埋嚟，整個板塊就已經散晒，在在揭示港股投資氣氛弱不禁風。睇來睇去，仲有乜板塊好買？說實話，近期可作中線投資的板塊確實唔多，但亦有某類型板塊仲可以望望，金礦股就係其一。

金價支持位逐漸上移

前文提到，環球經濟不景氣持續，避險資金唔係放入美元就係押注黃金，加上美國減息周期快將啟動，在避險需求上升及美元中線或因減息因素而回軟，有利以美元計價的金價更上一層樓，在此前提下，金價中長線前景確係幾樂觀。

走勢上，金價於六月初自1,300美元破位而上，雖然六月尾至今主要維持在1,380至1,450美元之間橫行上落區，而1,450美元睇落阻力亦唔細，但下方支持位已逐漸上移，預期中線整固一輪後，仍然有力再上。

一眾金礦股中，以紫金礦業（02899）、招金礦業（01818）及山東黃金（01787）最有鑊氣，正路可揸招金，主因有幾個。首先，招金是內地大型黃金企業，佔內地黃金資源量約十分之一，黃金佔集團收入達9成，金價升佢自然有運行。其次，集團持有約63%權益的山東海域金礦，預期在明年投產，估計兩至三年可達產量高峰，亦可作為股價爆上的催化劑。

走勢上，招金股價近幾個月愈升愈有，現價企穩多條主要平均線之上，短期守穩8.8元唔怕買，目標直指10元關，跌穿8.8元止蝕。

至於睇好金價的保守者，則可直接留意SPDR黃金ETF（02840），勝在追蹤金價走勢，且ETF交易費用較低，逢低吸納就包無錯。

古勝