絲絲講場：金融財俊驚亂 加速移民
有「測市王」之稱嘅外匯專家盧楚仁（Jasper），啱啱離職艾德證券期貨，打算一人打江山咁話。投資有道嘅佢，近排喺Facebook分享喺馬來西亞暢馬來西亞元嘅心得，同埋食榴槤嘅美味。絲絲細問之下，原來佢今次去馬國係為自己將來做準備！佢話見到香港近排咁多衝突事件，更加立定決心退休後要搵個安穩地方，所以已經買定海外樓啦！
早前因為工作關係，佢去馬來西亞考察，了解當地經濟前景同馬元走勢。點知咁啱畀佢睇中咗個樓盤，於是打算買入作為退休之用，上星期就去咗檳城簽文件，正式成為馬國業主。
盧楚仁：行家都諗緊
佢提到，近期修例風波，再加上日前元朗發生打鬥事件，令佢想離開嘅決心更大，因為覺得現屆政府管理能力奇差。「唔止係我啊！身邊唔少金融界朋友都開始諗移民。基本上，近日搵我了解馬來西亞買樓資料嘅朋友仲多過問外匯！」
佢透露，今次買入嘅單位實用面積1,220方呎，另外仲包兩個車位，但成交價就唔方便透露啦！一向熱愛跑步同運動嘅佢，仲大讚屋苑有24小時健身室，同埋3個游泳池，幾時想運動都得。
鍾情檳城 貪物價平
可能唔少人都會問，點解唔揀吉隆坡，或者去歐美退休呢？佢就解釋，檳城係十大移居城市之一，現時當地物價偏低，出街食餐飯都係十蚊八蚊港紙，人口又較少。馬來西亞仲係榴槤大國，60蚊港紙就已經買到一個榴槤，今次佢就同女朋友用200蚊食咗3個咁多。
此趟雖然買咗樓，但Jasper就話未想退休住，暫時會喺香港拚搏多幾年，層樓就暫時出租先喎。咁佢又多一門投資啦！
余絲韻