絲絲講場：李秀恒又出相集呻辛酸

介紹16個少數民族節慶

唔講唔知，中國有成56個少數民族，但係佢哋嘅獨特之處就好少人了解。李秀恒就覺得，要參與佢哋嘅節慶活動先會睇得出呢啲地方嘅風土人情，所以就用咗近四年嘅時間，去咗16個少數民族居住地，影低佢哋節日慶典嘅情節，加入文字同讀者分享。佢仲影咗好多風景面貌，原汁原味咁呈現畀大家睇。

佢仲話，呢本相集滲透咗好多甜酸苦辣，例如去到高原地帶出現咗啲高山症症狀，要一段時間先適應。當佢哋想去影長白山天池火山湖嘅時候，因為太大雪封咗路，要即刻租直升機拍攝。仲有次佢哋諗住去影清遠嘅戶外大活動，點知當地落大雨，但係錯過咗就要等多一年，所以佢哋頂硬上照影，仲笑住講最後變咗隻「大泥鴨」!

去咗咁多地方，李秀恒對西藏情有獨鍾，話當地空氣清新，四圍好靚！佢仲講：「嗰度雖然無一個好似鹹蛋黃咁嘅日落，但望住個天，由淺藍漸漸變成深藍，再變紫藍，最後變黑，真係好靚。」搞到絲絲都想去睇吓！

講番本攝影集，雖然暫只有中、英文版本，相信好快就會推出更多語言，令全球更多人了解中國少數民族文化。

余絲韻