絲絲講場：王石再創業豪玩賽艇
萬科集團前董事長王石卸任之後，最近再度創業，但今次就選擇做校長！作為一個有十六年經驗嘅賽艇運動愛好者，佢就揀咗呢項偏向冷門嘅運動做切入點，創辦深潛公司（Deep Dive），實行寓工作於娛樂。
畀番少少背景大家，王石嘅體育運動戰績輝煌！佢曾經兩度登頂珠峰，亦係完成過「七加二」（攀登七大洲最高峰同徒步到達南北極）嘅唯一一位中國企業家。
深潛公司估值5億
講番間公司，深潛主攻賽艇專業課程，要追溯間公司係點樣成立，就要講番一四年王石帶領16位企業家賽艇學員去英國劍橋大學，完成咗廿八天賽艇體育同教育課程。睇嚟絲絲都要參加多啲呢類活動，Brainstorm吓啲創業大計搵大錢先！
之不過，原來王石舊年先開始將深潛公司商業化，前身一直都叫做深潛海外訓練營，由創辦至今已經舉辦過九期活動。成功商業化後，今年頭四個月公司嘅訓練課程同用品銷售收入按年增長四倍；五月嗰陣，深潛更完成咗數千萬元人民幣嘅A輪融資，投資者包括基石資本。深潛公司依家最新估值超過5億元人民幣！
遠赴以色列學休息
王石更透露，為咗搞好深潛，佢去咗以色列希伯萊大學進修。學成之後，佢話最大嘅收穫係學習如何休息。佢話：「不只是人，是萬事萬物，農作物要休耕，教徒要過『休息日』」。仲表明，深潛要逐漸發展為一個綜合性運動和健康生活方式平台。
講到咁勁，當然公司除咗賽艇之外，未來都會發展更多運動類型，比如攀石、劍擊等課程，吸引年輕一族參加，咁到時王石咪更發達！
余絲韻