有唔少年輕人都想趁30歲之前去Working Holiday，但有冇諗過直情喺嗰邊搵份長工？
根據滙豐銀行一項調查發現，千禧及Z世代嘅專業人士去海外打工，人工同埋就業前景都有大躍進！其中人工會多逾三成，而香港更加係海外打工首選三大地區之一，人工會加逾四成添！
今次調查就訪問咗18,000個分布163個海外地區嘅就業人士，結果顯示，18至34歲嘅年輕專業人士，平均年薪可以由40,358美元（約31.5萬港元）上升至54,484美元（約42.5萬港元），升幅高達35%。
除咗人工升幅，去海外就業都有其他得着嘅。有超過三成海外就業嘅年輕人感覺升職升得快啲；而有七成人話學咗啲新技術；更加有五成半人話增強咗自信心。
另外，調查亦特別提到三個最廣受好評嘅海外就業地區，包括香港、阿聯酋及英國。其中，超過三分之二介乎18至34歲嘅專業人士話嚟到香港就業對仕途有幫助，一般仲加薪41%。
余絲韻