絲絲講場：啤酒商招股母企CEO「超神秘」
百威亞太（01876）星期五開始喺香港招股，但母公司百威英博（Anheuser-Busch InBev）首席執行官（CEO）布里托（Carlos Brito）冇出席到尋日嘅香港IPO記招，令絲絲非常失望。其實呢位CEO嘅個人資料一向十分保密，只知道每日會跑30分鐘跑步機，而其餘所有時間都放晒喺家庭同公司咁話。
話說百威英博一直好保護公司高層私隱，即使打聽吓布里托係咪傳聞中已婚同埋有四個子女，公司都以私生活為由唔肯證實。但絲絲都八到啲佢嘅背景資料！
促成四千億大刁揚名
布里托喺○五正式出任英博集團（InBev）CEO。而令佢一戰成名嘅功績，不得不提喺○八金融海嘯期間，促成收購美資主要競爭對手安海斯-布希（Anheuser-Busch）。聽講呢單收購價高達520億美元（約4,056億港元）嘅大刁，可以話係全球啤酒界世紀大併購。據說，單刁公布24小時之後，原本以巴西為基地嘅布里托，已經喺美國聖路易嘅安海斯-布希總部打點改革。
講到管理作風，布里托出晒名係強硬派！佢曾經向傳媒透露，要求所有員工每年都要接受考核，如果有員工未達標，又喺六至九個月之內未能夠改善的話，就會被叮走。仲坦言：「偉大嘅管理層能夠吸引更多偉大嘅人才追隨；但相反就會好危險，因為平庸嘅管理層亦只會吸引更多平庸嘅人跟隨！」
作風強硬 拒絕特權
據了解，布里托一七年時年薪約148萬歐元，仲獲贈總值2.5億歐元嘅股票認購期權，今次上市肯定更發達。佢身家雖然豐厚，但注重人人平等，要求員工直呼其名；同時拒絕公司畀佢嘅特權同福利，如可享用公司專車接送，亦唔會免費飲公司嘅啤酒，佢話要飲自己有錢買喎！
余絲韻