絲絲講場：股神銀包會有幾多Cash？
「股神」巴菲特多年嚟高踞一眾財富榜前列位置，最新數據顯示佢身家達885億美元（約6,903億港元）。不過，佢出名「慳家」，其中最為人稱頌嘅係佢每天都只會用3美元（約23.4港元）買早餐。
貴為「股神」、又喺全球財富榜名列前茅嘅佢，你估究竟平日會放幾多現金喺銀包呢？
出名慳家 拒使未來錢
佢之前接受外媒訪問時，終於解開咗大家心目中嘅疑惑。佢提到：「我最有可能係袋住400美元（約3,120港元）現金。我有98%時間會用現金。如果喺餐館，更成日用現金埋單，因為比起其他方法簡單。」
睇番現今年輕人興碌卡找數，對於信用卡，佢就話：「我喺一九六四年申請過一張。」咁即係話「股神」其實唔鍾意「先使未來錢」。
雖然平時好慳家，但係「股神」做善事就絕對慷慨過人。佢日前先宣布，捐出總值36億美元（約280億港元）嘅巴郡股票，畀好友及微軟創辦人蓋茨夫婦成立嘅基金Bill & Melinda Gates Foundation，同埋另外4個慈善機構。
余絲韻