Market Insight：物管股強得有道理

小心領展衝關歷時太長

板塊方面，近期投資者策略普遍「以守代攻」，不過防守股都唔係太引得起資金興趣，好似最打得的港鐵（00066）破位升完一輪後都要回一回氣，至於隻領展（00823）就更加屢次挑戰100元關不果，多少反映部分資金短期連守都唔係太願意。當然，有人話領展100元係「大關」，點都要等多陣先破得到上去，但從另一面睇，其股價自五月中至今僅主要在94至98元水平窄幅上落多時，如果短期內都衝唔上，慎防唔上就轉落。

咁實際少少，睇番重磅藍籌股又有冇運行呢？先睇最大隻的騰訊（00700），雖然話內地已重新審批網絡遊戲版號，基本面叫做有改善，但唔好唔記得中短線仍受大股東分拆行動與阿里來港作第二上市，所引起的資金分流等影響，所以見上周五股價都一樣要跌至352.6元收市。當然，港股如果可以再上騰訊都一定跟住上，但跟唔跟得足就真係有疑問。

北水撐內銀有托市之嫌

至於另外一隻大大隻的內銀股建行（00939）就唔好得幾多，純睇股價走勢就係威係勢，上周五仲上破250日線，收升0.7%報6.73元，但唔講唔知近期似乎都係靠北水撐場，好似上周五建行全日成交金額約30億，但北水已達13.4億元（都未計衍生工具數據），可見內銀股其實好大動力來自北水，咁若然從陰謀論角度出發，究竟當中有幾多係睇好其前景？又有幾多係作為撐市目的？當然答案就無得估，但多少會引起市場之猜疑。

咁有乜板塊都值得揀？掉轉頭睇，5G概念及手機設備股雖然近期升得唔錯，但都係睇外圍面色，反而輕資產的物業管理股就叫做我自行我路，加上又冇內房股咁受人民幣匯率影響（因為要考慮重負債因素），所以可視為另類內需股咁睇。

揀股方面，可吼人氣之選碧桂園服務（06098），近日股價衝高後短期若有回調機會，可留意20日線約16.8元承接，目價睇20元關，跌穿16元止蝕。至於佳兆業物業（02168）股價早前衝破11元後上升動力轉強，值得小注跟進，不跌穿20日線約11.3可續持有。另若要博追落後，則可留意彩生活（01778），早前跌到落73元又慢慢爬上來，營造穩定上升軌，短期若在成交配合下上破50日線阻力78.1元，應可更上一層樓，值得納入觀察名單。

古勝