絲絲講場：國際財星湧港撐金融學院
由金管局、證監會、保監局同積金局四大監管機構聯手籌備嘅金融學院，周三正式成立，為咗達到培育金融領袖目的，請來國際級金融名人做課程嘉賓，下個月打頭炮就係全球最大私募基金公司之一黑石聯合創辦人兼行政總裁蘇世民。
至於其他嘉賓，就有「鱷王」之稱嘅全球最大對沖基金橋水創辦人達利奧、國際清算銀行總經理Agustin Carstens、高盛總裁兼營運總監沃爾德倫、蘇格蘭皇家銀行主席戴維斯、滙豐控股（00005）主席杜嘉祺、前美國財長蓋特納，同前日本央行行長白川方明等，真係粒粒巨星！
金管局副總裁阮國恒話，香港一直有不同機構提供金融專業培訓，但喺培育金融領袖及應用研究方面有缺口，希望金融學院可發揮作用。
佢哋亦講到明學院只限受邀請嘅金融界人士參與，預期初階段約200人，下季發邀請不限於銀行業，仲有證券、保險、會計及法律界等專才。
參與培訓要「身家清白」
咁點先可以做被選中嘅人呢？佢話條件係要「身居要位」同「身家清白」，以香港為基地或同香港金融業有密切聯繫，希望透過課程擴闊跨國及跨行業視野嘅金融界領袖。
金融學院尋日仲頒發院士頭銜畀一眾金融界猛人，包括滙豐銀行副主席兼行政總裁王冬勝、保監局主席鄭慕智、友邦保險非執行主席謝仕榮等，佢哋遲啲仲會擔任埋主講嘉賓，搞到絲絲鬼咁興奮！
余絲韻