想進身百億富豪行列有咩秘訣？企業家Rafael Badziag訪問過21個白手興家嘅百億富豪，結集成著作《The Billion Dollar Secret》，並總結出呢啲富豪之所以發達，原來有以下六個共同習慣：
第一，早起身係成功嘅關鍵。21個受訪嘅百億富豪，平均起身時間係朝早五點半，佢哋都話早起身令佢哋精神啲同有活力啲，當日可以做到嘅嘢會多啲。所以，要成為有錢人，早起身係必須嘅！
第二，要學識養生。億萬富豪都有運動習慣，無論幾多歲都好，都堅持要跑步同做Gym。因為咁樣做可以保持精力充沛，頭腦清醒。另外，佢哋亦好注重均衡飲食，同埋唔會食煙。
第三，「書中自有黃金屋」，要做有錢人就要多閱讀。受訪嘅億萬富豪都會經常睇啲佢哋認為有價值嘅刊物，例如傳記、行業雜誌、商業書籍，甚至偵探小說。好似股神巴菲特每日就花八成時間去閱讀。而Badziag仲教大家一套有系統嘅閱讀方法，就係要先寫低自己想睇嘅書，訂立一個每日閱讀嘅時間，睇完仲要寫筆記，消化吓啲內容。
第四，畀時間自己沉思。大部分富豪都會透過冥想或者做運動嘅時間安靜思考，問吓自己，點樣可以搵多啲錢？我做運動做得夠唔夠？我仲可以參加啲咩慈善活動？
第五，要建立衡常習慣，為成功奠下根基。最重要係培養早上做事嘅習慣，如以上四個習慣都喺朝早做，就有最顯著嘅效果喇！
最後，就係要律己以嚴，唔好畀自己鬆懈。自律嘅人先會令自己持續地投入喺佢哋需要做嘅事，唔會輕易放棄！不過，人係有惰性嘅，有錢人有時都會懶， 最緊要就係用意志戰勝惰性！
余絲韻