Market Insight：友邦保險強勢有因

上周內地A股喺人民幣匯率持續回勇下向上，滬綜指突破三千點關，但港股就未有跟足，唔少個股都有回吐，畢竟周末唔知美國總統特朗普又有咩偉論，加上香港立立亂，埋單計數，輕倉過周末係正常不過。展望本周市況會趨向波動，做好做淡都好，要嚴控注碼，謹記依家唔係瞓身博的時候。

藍籌股友邦保險（01299）上周股價最多累升逾12%，走勢之強，是金融海嘯以來鮮見。市場憧憬，中美若能達成貿易協議，少不得開放內地保險市場，友邦將會成為受益者。睇到呢轉升浪，有成交支持，有貨可以繼續坐，毋須要急於估頂；至於冇貨又想上車的話，可以留意回吐喺80元邊承接。

上周傳來中電控股（00002）發盈警，以為睇錯，好端端一家公用股，有盈利保證，何解會搞到發盈警？原來係因為要就澳洲業務撥備所致。由於消息對股東而言頗為「震撼」，上周五股價曾跌逾半成。雖然有大行估計，今年公司派息不會受影響，但始終估值要打個折扣，暫時先觀望85元承接，再作部署。

維他奶部署分注翻兜

另一隻走樣的個股係維他奶國際（00345），上周公布完業績後，股價失守40元關，上周低見38.2元，成交大增。事緣維他奶全年盈利僅多賺19%，市盈率超過60倍，估值高得令人「嘔奶」﹗

不過，老古認為，股價升咗咁多，藉消息調整唔係咩出奇，最重要係呢家公司企業管治質素同執行能力都好，雖然盈利增長未如大家預期，但從另一角度睇，係之前指數基金過度炒作，並掉頭沽空，引發波動而已。估計是浪落到37元水平將會有初步支持，而明年係公司踏入80周年，或會派發特別息，短線策略可以先待低位承接區出現，沽空減少，再部署分注翻兜。

油股短炒首選中海油

呢期油價同金價向好，油股同金股都精神番啲。油股短炒首選依然係敏感度最高的中海油（00883），而金股方面，老古上周一提及，買金礦股就不如買黃金ETF，當時SPDR金ETF（02840）才1,000元，上周五高位見1,040元，已上車可以安心穩坐順風車，未上車都仲可以趁回吐分注入市，目標反覆向1,200元推進。

古勝