絲絲講場：新股敲鑼儀式換新Look
香港交易所（00388）舉行新股上市敲鑼儀式嘅大堂，最搶眼嘅自然係三塊相連嘅大型電子屏幕背景板，而呢塊屏幕最近有新搞作，就係換咗個底色，由「藍白藍」，變做淨「藍」（港交所用開個隻藍色）。中間屏幕仲有勁大個「電子鑼」，鑼面會顯示當日上市公司嘅名稱同股份編號，在場人士唔使驚睇唔清楚！
特大「電子鑼」識得震
你以為個特大「電子鑼」只係普通一張靚相Key上去冇乜特別？睇真啲個「電子鑼」好似有塊紗遮住，若隱若現咁。原來，當有人敲吓放喺「電子鑼」側邊嘅真銅鑼時，個「電子鑼」立即變銅色，同真嗰個孖生兄弟咁款。唔止咁，佢仲有震嘅Effect添，夠晒動感！
仲有個亮點，就係「電子鑼」上顯示嘅「HKEX」嗰幾隻字都變咗白色加紅色，不過大家唔好諗多咗，查實只係唔想同背景撞色啫。
港交所就話，新背景屏幕用咗上市象徵嘅「鑼」，同新股發行更貼切，負責嘅同事用咗好多心機先整好o架！對於呢個新背景板，唔知你又Like唔Like呢？
至於尋日上市帶頭用新背景嘅新股中國民辦高等教育機構嘉宏教育（01935），雖然股價開市一度「潛水」，曾低見1.45元，較招股價1.5元低3.3%；好彩尾市買盤積極，收報1.65元，較招股價升高10%，散戶結果每手帳面賺300元。
余絲韻