絲絲講場:雷蛇推能量劑幫機迷提神?

電競股雷蛇(Razer,01337)自家電腦產品包羅萬有,不過愛搞新意思嘅佢又點會滿足?好似上個月先宣布未來會出產雷蛇多士爐,今個月又有新搞作,撈過界推出一款專為電競玩家而設嘅飲品「Respawn」,聲稱能夠令機迷長時間保持集中力同警覺性,提升「腦力」咁話。

咁「Respawn」同一般能量飲品有咩分別呢?雷蛇就解釋,普通能量飲品含有大量嘅糖同咖啡因,而「Respawn」就無糖,用咗人造甜味劑代替。正喎,各位機迷就算長期坐喺度打機都無咁易變肥仔啦!

一日唔好飲過3包

「Respawn」沖劑暫時有4種味畀大家揀,分別係藍莓、青蘋果、熱帶菠蘿同石榴西瓜。打機打到無精神即刻沖包嚟飲,可以提神、加快反應,仲提升埋集中力,對長時間打機嘅電競選手嚟講,仲唔係闖關神物?不過雷蛇就提醒各位機迷每日唔好飲超過3包,家陣喺美國亞馬遜同雷蛇官網已經推售,但未知市場受唔受?

今次雷蛇推出電競飲品,據講背後另有盤算,就係雷蛇未來會積極利用「Respawn」嚟打入電競活動市場,例如贊助比賽嚟提升國際知名度,果然唔簡單!

余絲韻