絲絲講場：上市唔成 比特大陸自拓交易所
舊年年底，全球最大嘅虛擬貨幣掘礦機生產商比特大陸（Bitmain）申請嚟港上市最終被拒，公司創辦人之一嘅吳忌寒銷聲匿迹咗半年，依家捲土重來，不過唔係申請掛牌，而係靜靜地開咗間虛擬貨幣交易所Matrix。
據講Matrix會喺今年七月投入服務，為客戶提供虛擬貨幣託管、抵押借貸、高息資金管理同場外買賣等，做到成間虛擬貨幣銀行咁，會透過一家離岸控股公司開展業務，公司就設喺香港。
主攻買賣存管虛擬幣
其實Matrix喺今年三月底、當吳忌寒辭咗比特大陸聯席ＣＥＯ時已埋班，佢仲搵埋入室大弟子，今年二十七歲、曾喺比特大陸負責投資部門嘅葛越晟做總裁。市場指，吳忌寒擁有世界上最大嘅比特幣礦池，同埋最勁嘅掘礦機，所以佢一於由租售礦機、掘礦，以至虛擬貨幣場外買賣都攬上身。
絲絲仲索到料話，雖然Matrix最大嘅客暫時只係背後母公司比特大陸，不過佢哋目標係做全球最大嘅虛擬貨幣交易和存管平台，以至虛擬貨幣資產管理公司。查實佢對手都唔少，包括內地嘅火幣網、幣安及OK Coin等，同埋Circle及Coinbase等更巨型嘅競爭者添！
余絲韻