Market Insight：國指萬點大關受考驗

醫藥股捱沽，石藥集團（01093）及中國生物製藥（01177）股價跌2至3%。事緣有消息指，內地財政部擬於六至七月抽檢77家醫藥企業會計訊息質量。

美國嗌減息 禍福難料

老實講，財政部呢啲動作，應該係恒常化才對，用來做沽售藉口，未免太牽強。咁亦反映到，如今股海大風大浪，人心虛怯，有咩風吹草動，投資者都係先沽為敬。照計呢啲無厘頭的跌勢，可以視為中長線分注收集的機會，畢竟優質藥企唔會怕政府來查數，無端端咁畀人沽一浸，只怪現時中資股氣氛真係太差，買貨意欲低迷。

港股呢期彈唔起，主因都係受外圍美股同A股跌勢拖累。美國話要對四大科技股FANG展開反壟斷調查，似乎呢個特朗普政府對於美股調整真係冇有怕！見到美國五月份ISM製造業指數創下兩年半新低。再睇美國利率期貨顯示，市場預期聯儲局最快七月就會減息四分一厘，半年內三次減息合共至少四分三厘。咁搞法，到底美國經濟有幾糟糕，減息係好事定壞事，倒值得投資者深思。

眾多板塊各有利淡因素

近日國企指數沽壓再現，似乎在預示A股尋底格局未變。無論喺內險股、內銀股、甚麼中資股板塊都好，老古始終認為，等國指跌破一萬點關，先至好再諗係咪撈貨。

盈富基金（02800）昨日成交超過24.9億元，沽空額8.9億元，此前已連續七個交易日錄得單日沽空額超過十億元，相信係與唔少不能以沽期指做套戥的基金，以沽空盈富進行風險對沖有關。

環顧眾多重磅板塊、地產、銀行、內銀、內險、內房、醫藥、手機設備、能源、汽車、科網股等，本身都各有利淡因素拖累，所以就連指數橫行、板塊輪流炒作的日子都不再了。後市指數要有較大幅度的反彈，只有寄望月底前貿易戰傳來佳音，但呢個可能性唔大；咁另一個結果，係繼續維持彈散格，缸邊友得一千零一招，就係逢反彈加沽。

睇來睇去，都仲係隻領展房產基金（00823）夠堅挺，昨日微升0.1%，收報95.95元。畢竟盈利受外圍波動影響不太直接，加上公司有回購股份計劃。有錢留喺魚缸，泊住喺呢隻奇葩股，亦未嘗唔係短暫的應對之策。但謹記，若然就連呢啲避險股都急跌，睇怕就係魚缸打十號波之時，到時除咗現金，咩都唔好揸！

古勝