絲絲講場：Naspers講科網股 不忘晒命

Naspers位CEO Bob van Dijk最近接受訪問，話呢幾個月中國科網界好血腥，多家公司因中美貿戰而被針對，包括騰訊在內都成為貿戰嘅犧牲品，於貿易關係緊張下，所有人受害，無一幸免。

投資騰訊一舉成名

不過咁，佢話睇嘢要睇十年，佢哋就一向睇長線，依家中國經濟嘅基本因素依然「非常、非常咁強勁」，所以只要市場仍然存在，創新依然存在，中國科網市場長遠就一片光明咁話。

咁騰訊呢？van Dijk當然繼續唱好，話多得騰訊嘅本土經營模式，所以一啲都唔擔心喎，仲話○一年以3,200萬美元入股當時仍藉藉無名嘅騰訊，可能係Naspers歷來最成功嘅投資。咁梗係，Naspers持有31%騰訊股份，批股份依家已升值到1,260億美元！

余絲韻