絲絲講場：碧桂園起樓七成想靠機械人
發夢絕對唔係壞事，試問無想像力點做大事先？碧桂園（02007）集團董事會主席楊國強有個機械人夢，舊年先至話要將公司發展成科技企業，眨吓眼旗下廣東博智林機械人公司已經研發咗超過20款建築機械人，最近仲掟咗其中八款入碧桂園地盤測試，聽講明年就可以開始用機械人起樓。但咁樣會唔會搶晒工友飯碗？
楊總拍心口叫大家放心，雖然相信好快碧桂園嘅地盤，大約七成會係機械人，其餘三成就係熟手工人。但其實機械人取代人類唔係新鮮事，佢亦都打算培養20%新一代嘅建築工人去操作機械人，咁樣工友咪有新出路。用機械人嘅好處係夠安全，又可提高生產效率同埋慳番大量成本，簡直係雙贏局面。
掟800億實現機械王國
集團未來五年會至少投放800億人幣，建造一個達10平方公里嘅機械人谷，去實現楊總心目中嘅機械王國。楊國強又透露，碧桂園已經聯同內地十八間著名大學合作，除咗建築機械人外，集團研發嘅機械人將來會應用喺各行各業，包括醫療、農業、管理同埋食肆等。絲絲真係要學吓楊總，發夢都要發到咁遠大！
余絲韻