絲絲講場：港交所上市部返7日每天12粒鐘
香港交易所（00388）中國區上市發行服務部主管兼高級副總裁陳叢出席活動時自爆，港交所上市部同事全年無休檢驗招股書，工作制係「127」（每日工作12小時，每周返足7日），比起中國某科網公司員工嘅「996」（每日朝9晚9，每周6天工作）仲辛苦。
但佢強調咁樣做可保障投資者嘅同時，又可以為準上市公司服務，工作辛苦啲都值得。話時話，舊年香港有218間新上市企業，睇嚟港交所嘅上市部人員功不可沒。
不過，有人質疑，公司喺香港申請上市需要幾耐時間，就難估過美國。陳叢即時澄清，港交所喺上市有明細嘅規條，而審核時間視乎上市公司嘅招股書披露夠唔夠，最快嘅案例係喺八星期內就能預登初步招股文件。
其實上市速度唔係最緊要，企業合規、上市後表現仲重要，否則害到投資者損手爛腳仲弊！
余絲韻