絲絲講場：虛銀熱身戰籃球場開打
香港虛擬銀行未正式開業已率先互片！周三舉行籃球聯賽，由五間新鮮出爐獲發虛擬銀行牌照機構，加上滙豐銀行嘅PayMe混戰，火藥味十足，今次可能係香港第一次上演「金融科技界籃球賽」！
當晚總共有六隊落場，眾安虛擬金融一開頭就先拔頭籌，以3分之差險勝渣打銀行。另一邊廂，有外籍籃球教練助陣嘅滙豐PayMe代表隊，就大比數力壓尚乘集團。但今次活動主旨係「友誼第一，比賽第二」，相信賽果係點唔重要。
金融科技界借機聯誼
聯賽舉辦方Finnovasia行政總裁Anthony相信，運動比賽係一個好機會畀各個金融科技界人士，喺工作場合以外聚首一堂，希望藉今次活動為香港金融科技界社區建立良好關係。
唔知係咪獲發虛擬銀行牌照太興奮，Anthony透露，大家對今次活動反應非常熱烈，一個月內就籌備好賽事。佢仲話，一開始搞活動時只係想邀請六隊參賽，但最後規模大到要分兩季進行，第一季已有十五隊、超過250個球員出場比賽，周三只係前哨戰，而第二季將會於八月舉行。
老實講，呢幾間虛擬銀行將來難免成為對手，透過今次打場友誼波之餘，又能夠摸摸對手底蘊，反應咁踴躍一啲都唔出奇，可能對未來實際商戰仲有啟示！
余絲韻