絲絲講場：滙豐保險由跑數鬥到煮餸

保險同烹飪聽落大纜都扯唔埋，但煮嘢食竟然係增添公司良性競爭氣氛嘅秘密武器！滙豐保險簡直係完美示範，大角咀辦公室搖身一變成為設備齊全嘅廚房，舉行廚藝大賽，員工食神上身，嚟個廚藝大晒冷，由ＣＥＯ文德華（華仔）擔任評判，戰火四起。

今次比賽以「雞」作為主要食材，所有參賽團隊需喺三十分鐘內，發揮團隊合作精神，自由創作出最出色嘅佳餚，公司仲請嚟人氣飲食作家現場為同事示範斬雞技巧，最終只有四隊參賽隊伍成功進入決賽。

廣東人煮雞嘅方法特別多，但到底點樣先可以贏得嚟自英國嘅華仔歡心？經過一輪激烈比賽，由營運部代表隊伍嘅作品，亦即係同時結合中西文化嘅粵菜「西檸炸軟雞」成功跑出，獲得評判一致讚賞，勇奪「滙豐保險終極廚神大獎」。

原來現場亦設有法式糕點畀同事品嘗，未有到場觀賽嘅同事亦可以透過直播觀賞賽事。其實做保險呢一行經常要「跑數」，壓力真係好大，有時搞吓廚藝比賽，反而可以令同事感情變好，做嘢自然爽手！

余絲韻