絲絲講場：硅谷富豪科幻怪招養生

PayPal主腦玩人體冷凍

例如今年55歲嘅PayPal創辦人泰爾，係一名典型抗衰老先鋒，好耐之前佢已講明目標要活到120歲。為咗成事，佢已經用咗超過700萬美元（逾5,460萬港元），每日都食生長激素，另外仲Book埋「人體冷凍計劃」，希望離世後有機會藉此重生。

而今年年屆75歲嘅甲骨文（Oracle）創辦人埃利森，一向被人稱讚識享受人生，佢除咗平日喜愛駕駛私人豪華遊艇出海享受陽光之外，原來仲投資咗4.3億美元（約33.5億港元）喺一家專門研究抗衰老科技嘅長壽中心，又捐咗約2億美元（約15.6億港元）畀南加州大學癌症研究中心，作為癌病研究資金。

Twitter 杜斯	PayPal 泰爾	Facebook 朱克伯格

Twitter舵手印度禪修

至於美國知名社交網站Twitter嘅CEO杜斯，今年43歲，唔係咁快就怕死呀？佢曾參加一個為期10日嘅印度禪修之旅。喺呢10日修行期間，除咗每日要進行10小時冥想，修行者仲乜都唔可以做，但原來咁就可延年益壽喎。

Facebook（Fb）創辦人朱克伯格最後生，今年先至35歲，而佢嘅長壽心得係要食得「乾淨」，所有放入口內嘅動物肉類，都要經由佢本人親手宰殺，如果唔係就寧願食齋。到目前為止，據講朱仔平時都只係食蔬果為主，好少落手殺動物，而經佢親手手刃嘅動物暫時只包括雞、豬同牛！

至於教曉朱仔殺生嘅，原來係佢喺硅谷認識多年嘅女性友人、Flea Street Café大廚及老闆Jesse Cool。當朱仔殺生後，會將動物交畀Jesse嘅餐廳，然後烹調成菜餚。聽完幾位富豪嘅長壽秘技，大家係咪有好大得着呢？

余絲韻