孖妹S檔案：股市難玩 炒商品期貨定驚

葉：英皇期貨營業部總裁 葉佩蘭

潘：亞達盟環球期貨副總裁 潘志偉

許：耀才證券執行董事兼行政總裁 許繹彬

林：耀才證券銷售及客戶服務部分組經理 林煒壕

期貨交易：短線操作 涵蓋指數外匯

Kitty：期貨有咩吸引之處呀？

葉：炒期貨可以做槓桿，即日買賣，又可買升買跌，仲唔一定要實物交收。

許：環球期貨有分指數、利率、外匯、農產品、能源及貴金屬等期貨。指數及外匯期貨無實物交易，而就算商品期貨有，券商一般都會喺實物交收前一個星期做結算。另外，要留意證券行嘅期貨告示板，上面會列明合約最後平倉日，到期就會被強制平倉。

彩兒：期貨好似有唔少條款。

潘：炒期貨屬短線操作，預測未來幾個月嘅走勢。因期貨合約有到期日，例如買大豆期貨，就可揀一、三、五、七、八、九及十一月份到期嘅合約。如果睇長線，就買ETF（交易所買賣基金）好過炒期貨。

耀才林煒壕表示，若中美貿談有成果，大豆價格料將反彈。	英皇葉佩蘭表示，原油有金融屬性，較受政經局勢影響。	耀才許繹彬提醒，留意證券行期貨告示板上所列明合約最後平倉日。

高流通量產品較穩陣

彩兒：通常近月份嘅期貨合約買賣差價細啲，成交額亦多啲。因投資者可轉倉（Roll Over），賣出快到期月份，同時買入遠到期月份合約。

Kitty：咁多種期貨，炒邊樣好？

林：不妨揀原油期貨、黃金期貨及SGX富時中國A50指數期貨等，佢哋都係市場最近熱炒嘅期貨。再者，如果期貨有高流通量，買賣差價會窄啲，且沽貨都易啲。瀏覽芝加哥商品交易所（CME）某合約按日成交量及未平倉量，就可判斷該合約活躍程度。另外，亦要留意該商品期貨交易時段，例如夏令時間木材期貨周一至四交易時段係香港時間晚上十點至翌日早上五點，喺呢啲凌晨時分，就要夜貓先啱炒喇。

Kitty：期貨有得做槓桿，如果我每樣買啲，係咪最精明呢？

彩兒：期貨多數係專業投資者玩，所需嘅投資技術都高啲，無經過深入鑽研，唔好亂炒。

林：我見過投資者賣樓炒期貨，輸咗千萬元。所以炒期貨必須定止蝕，亦要見好就收！

炒期貨含槓桿，投資本金係細啲，但投資風險又會大咗。開倉按金就係投資本金，例如一張大豆（Soybean）期貨開倉按金為2,057美元，而維持按金為1,870美元；其七月到期合約開盤價為835點，每點50美元。若價格跌4點或以上，即200美元（4點x50美元），咁按金水平1,857美元（2,057美元-200美元）就會跌穿維持按金，屆時就會被Call Margin。情況就似供唔起樓會被銀行追收貸款（Call Loan）。

增開倉按金減低槓桿

彩兒：跌4點可能係眨下眼嘅事。

林：無錯。投資者宜增加開倉按金，減低槓桿比率。若開盤價（835點）乘每點50美元，再除以開倉按金（2,057美元），即槓桿比率20倍。

潘：股票戶口一般唔可以投資期貨，要另開一個期貨戶口，並作風險聲明。而買賣期貨沒有T+2，無論好倉淡倉都要交最初保證金。再者，期貨價格會較現貨價高少少，內含利息、保險費及倉租等，但高買高沽，所以成本都無咩轉嫁畀投資者。

亞達盟潘志偉指，市場避險情緒升溫，故看好期金價格。

商品期貨價格及入場費

黃金期貨：短期料升至1350美元

潘：以黃金100安士紐約期金合約為例，若期金價格跌1點，期貨合約價值就會郁100美元。而最初保證金係3,740美元，維持按金設喺3,400美元，如果跌低於維持按金水平，經紀行通常會要求你補倉。

受惠避險情緒升溫

潘：除非係急跌，經紀先會即時打畀你，若未能補倉才會直接幫你平倉，否則喺正常情況，若期金價格唔跌超過三成，佢哋都會等當日收盤出Statement時先Call你。另外要注意，若期金價格有超過37.4美元波幅，期金合約價值有機會跌到零，甚至負數。

Kitty：開咗戶口，我就可以喺電子及手機交易平台買賣？

潘：無錯！不過入市前一定要分析該商品嘅技術走勢、基本因素及資金流。例如，過去金價由1,350美元跌落下降軌，但最近就升穿下降通道，有向上勢頭。另中東地緣政治風險升溫，中美貿易談判嘅棘手問題，令避險情緒加劇，所以我睇好期金價格，預計喺未來三個月會漲至1,350美元。若投資者入市，我會建議於1,265美元止蝕。

彩兒：美國商品期貨交易委員會（CFTC）月初公布，買黃金長倉嘅數量增加，顯示投資者睇好黃金。自中美兩國二○一八年七月六日爆發貿易戰以來，期金價格上升逾3%。

許：金價有段時間徘徊喺1,200至1,300美元，但亦有人趁政治市，及吼非農數據出爐時炒吓。

大豆期貨：貿戰影響 勿心急撈底

彩兒：大豆交易被視為中美貿易談判進程晴雨表，係中國報復嘅主要針對商品，所以拖累美國大豆期貨價格於五月十三日跌穿8美元關，低見7.91美元，創○八年十二月以來最低。

葉：其實，大豆價格主要受其供應影響，少受政經局勢及環球投資信心左右，之不過，是次中美貿易關稅壁壘直接影響全球大豆供應鏈。中國向美國買少咗大豆，轉向巴西、阿根廷等地進口。另一邊廂，美國或增加對歐洲等地出口，令大豆價格大幅波動。

睇種植面積推算走勢

葉：美國大豆及玉米係一年種一次，四月播種，十月收成，所以其價格有周期性，九至十月通常最平。美國農業部會定期公布農產品市場供需報告，當中種植面積反映其供應，如果面積細咗，代表供應少咗，價格理應增加。然而，農產品產量亦會受天氣影響，若天氣唔好，農產品失收，其五至九月價格亦應會調高。

Kitty：中美貿易談判一日未有結果，大豆價格就會一路跌？

葉：我覺得價格跌極有個譜，每蒲式耳8美元有支持。因農夫種大豆有成本，另如果價格跌得太低，農夫可能改種其他農產品。但目前大豆成為眾矢之的，所以未係撈底好時機。如果要炒，我會建議買小麥期貨，上望未來一季升到每英斗5.3美元。

林：我認為大豆仍有得跌，但若中美貿易談判傾得成，預計大豆價格將反彈。

Kitty：大豆及瘦豬期貨價格有冇好大關連？

葉：若豬隻數量下降，即意味所需大豆飼料減少。例如去年中國豬隻出現感染非洲豬瘟個案，豬隻減量，不夠自給自足，令豬價短期內上升。惟豬價受供求嘅影響無農產品咁大，因養豬唔使理會天氣，而豬瘟疫情都係罕見。

原油期貨：倘落實減產 有望炒上

葉：原油喺夏天駕駛高峰期及冬天燃料供暖時需求特別大。另原油有金融屬性，較受政經局勢影響。若石油輸出國組織（OPEC）喺未來六個月協定減產，油價理應會炒上。另外，美國、沙特及俄羅斯等產油量亦會影響價格。

Kitty：油價消息多到我好心煩。

葉：所以炒油要速戰速決，為期一周至一個月。油價喺一六年十一月跌至每桶26.05美元，我成功估中油價會反彈，因採油始終有成本。

彩兒：原油期貨自一四年飆高至107美元後回落，之後就喺40至60美元浮浮沉沉。唔知上星期二沙特一條重要輸油管遭無人機轟炸，會唔會推升油價創新高呢？我哋拭目以待。