絲絲講場：悅旅掛牌88歲主席滿場飛
尋日新股市場好熱鬧，優閒旅遊集團海天地悅旅（01832）同中國福建工業材料供應商星宇控股（02346）齊齊掛牌。年屆88歲高齡嘅海天地悅旅主席兼非執行董事陳守仁，更開心到滿場飛，致詞時仲好有中氣，講嘢夠晒大聲，場內唔少嘉賓都讚陳主席「聲氣」夠。
紀念品「鼎」唔起股價
佢話好開心見到公司上市，興之所至仲化身成為關島及塞班島旅遊大使，叫大家有機會可以去吓海島，感受吓度假風情，放鬆放鬆！
海天地悅旅尋日仲送咗個琉璃鼎做紀念品，驟眼睇無乜特別，其實暗藏玄機，鼎嘅兩隻耳仔係藍色，中間鼎身係綠色、黃色，代表「海、天、地」，正正係公司名同業務所在地關島及塞班島嘅象徵！
可惜上市首日股價就頂唔起喇，開市已較招股價3.54元，跌6.77%至3.3元。到收市亦未收復失地，跌2.25%，報3.46元。
星宇贈字大玩諧音
至於星宇控股就送咗幅書法，大玩諧音之餘，仲等你可以一眼睇明公司業務係做乜。幅書法寫上「磁質以恒」，用普通話讀，即係「持之以恆」，唔研究吓，原來公司係一間燒結釹硼磁性材料生產商。燒結釹硼磁性材料係磁質一種，好多電子零件都用得到，例如手機零件及新能源汽車零件等。星宇上市首日收報1.11元，較招股價1元升11%。
星宇上市亦引來獨立股評人「贈興」，話招股書中獨立非執行董事范駿華嘅簡介履歷，有誇大嫌疑，但星宇CEO呂竹風就回應話「相信律師嘅專業程度。」
余絲韻