依家咩都講創新，就連買金都要潮過人。話說金銀業貿易場好快就會推出數碼黃金平台「GoldZip」，只需要透過手機同電腦即可實現24小時買賣黃金。唔單止咁，GoldZip首席執行官Calvin Ng透露，嚟緊仲會推出GoldZip信用卡，直接用信用卡喺唔同零售商同餐飲店進行消費。

另外，GoldZip自動櫃員機今年亦會準備就緒，當然唔係直接撳機攞舊金出嚟，而係用戶可以將帳戶入面嘅黃金倉存量，按國際金價提現金出嚟，不過可能會先喺東南亞市場推出，香港就要再等等喇。

金銀業貿易場理事長張德熙話，將實體黃金數碼化呢個Idea係佢喺二○一七年底開始諗，佢自己亦去咗好多個關於區塊鏈嘅論壇同活動「取經」添。

為吸引散戶買金，GoldZip出到黃金數碼化可謂用心良苦。張德熙話，皆因成日收到散戶提問話想投資黃金，但又苦無渠道，而GoldZip唔單止支持24小時交易，就連紅日假期都可以買賣，而且黃金投資單位更由每公斤細化至每克，入場費三百幾蚊就有交易！聽到絲絲都心思思想買番啲，當做投資儲番啲私己錢先！

余絲韻