Market Insight：股王做定兩手準備

內地A股周二偏軟，滬綜指失守2,900點關。港股在長周末後復市再跌，恒指一度低見27,925點，惟收市叫做守得住250日線（28,000點關），表現差之餘又未算係貼地。之不過，唔少大價股走勢已明顯轉弱，包括股王騰訊控股（00700）。若然短線確認失守50日線371元，則年初以來的升軌將受破壞，今個跌浪最低消費可能要去番340至350元水平。

將受惠科創板推出

雖然股王短線調整之勢漸成，但股民都要有做定兩手準備的心態，留意今日其公布的季績表現。畢竟依家美國經已講到向全部中國商品加徵關稅，短時間內唔會再有「勁」招出擊，加上下個月內地推科創板可能有進展，作為科網股氣氛風向儀的騰訊肩負非常任務，若然呢浪守得住啲大位，又可以睇睇有冇分注反手建倉的機會。

大行的金科玉律係見高拜、見低踩！年初兩地股市係咁升，大行紛紛發表研究報告上調恒指及國指預測。可如今中、港兩地股市都轉弱，班大戶又開始推翻昨日的我。

美元偏強不利金價

大摩最新發表的研究報告，將二○二○年年中恒指的基本預測目標由31,900點下調至30,800點，國指則由12,900點下調至11,700點，而恒指「最熊」預測係見23,600點；瑞信就將恒指目標由31,000點下調至30,000點，國指目標由13,000點下調至12,000點。

所以話，喺大行做研究報告真係幾易做！想起上月大行紛紛唱好香港樓市及地產股的評級，那依照大行的高拜低踩定律，似乎地產股的策略宜逢高套利為妙，等到班大行發報告調低先識落車，只怕又得番蔗渣價！

股市動盪，仍留喺魚缸的資金，都在爭相流入避險股，見到港鐵公司（00066）、領展房產基金（00823）、長江基建集團（01038）、中電（00002）、中華煤氣（00003）、電能實業（00006）皆得以逆市報升收場。喺呢啲波動市，公用股係勝在「抗跌」，但別期望有好大升幅，千祈咪表錯情。若然唔想冒險，仲係揸現金最實際！

全球風險胃納下降，近日人民幣又再貶值，金價略為回升，但老古唔會叫人買金。一來如今市場已改變，多咗電子貨幣可供炒賣；二來今時今日年輕人婚嫁鍾意買鑽戒多過金飾；三來全球仍屬低通脹，買金抗通脹暫未見迫切。更何況，現時美元偏強，別說聯儲局根本不太傾向減息，其他非美元貨幣近期卻已紛紛陸續減息，加上避險需求上升下，美元短線將保持相對強勢，反需提防金價高位會有回吐壓力。

古勝