絲絲講場：財金圈窩心貼士氹媽媽
今個禮拜日就係母親節，唔知財金界會點樣同媽咪慶祝呢？絲絲就搵咗以下幾位老友了解吓，睇吓佢哋點樣表示孝心先。
黎永良提醒阿媽沽貨
時富金融優越投資部顧問黎永良（Peter）笑笑口話，自己係孝順仔，但從來唔會慶祝母親節，皆因佢經常都會同阿媽飲茶食飯，日日都係母親節咁話。
不過，其實佢早就送咗份厚禮畀阿媽，仲係意義重大嘅！
份禮物係乜？投資了得嘅Peter，喺四月尾時提阿媽沽晒啲股票，話侵侵（美國總統特朗普）份人反口覆舌，未來個市會好亂，就係咁，阿媽就成功避過咗五月份嘅小股災，不但無蝕錢，今年炒股仲獲利三成，可以過一個淡定又滿足嘅母親節啦！Peter透露，媽媽年初時入市買咗中國移動（00941）、騰訊控股（00700）同一隻內銀股，自己無乜畀揀股意見阿媽，但見佢成績都唔錯！
女士又點呢？志昇証券研究部董事麥嘉嘉（Avis）話，主要會同媽咪出街食飯慶祝，禮物就多數會送佢用開嘅護膚品，可以話平淡得嚟又溫馨。絲絲覺得護膚品禮物好貼心，等媽咪可以繼續扮靚靚。
譚朗蔚：用盡花言巧語
至於股評人譚朗蔚（Stevan）話，之前同媽媽去台灣旅行就當係慶祝。臨近母親節，就簡簡單單食餐飯。至於送禮物，佢就話無喇，否則每年送條金鏈，咪儲儲埋埋一櫃鏈。絲絲反而覺得，近排金價強，若果送金鏈，係實際又冧人之選！
口才了得嘅Stevan反駁，話梗係用花言巧語氹太太同媽媽：「多謝太太生咗兩個仔！多謝媽媽生咗我！」而佢仔仔就自己畫咗張卡畀媽媽同嫲嫲，唔知卡上係咪都寫上花言巧語呢？
余絲韻