絲絲講場：Apple出Game明玩股神
股神巴菲特撐頭號愛股蘋果公司（Apple Inc.），出錢又出「樣」！股神除咗真金白銀買股份，仲「賣樣」做Apple自家設計遊戲嘅主角。股神瞓身支持，Apple股價今鋪睇嚟有運行。
外媒話，Apple最新推出免費手機遊戲「Warren Buffett's Paper Wizard」（巴菲特的報紙精靈），股神落場做主角。玩家要穿越巴菲特家鄉奧馬哈（Omaha）巴郡股東大會現場同Apple加州總部，將報紙準確地拋入屋或大廈指定樓層先有分。沿途如果拋中車同雀仔就扣分！
由庫克同巴菲特一齊設計
聽講隻Game係股神Apple行政總裁庫克一齊諗出嚟，相信股神好懷念13歲做過《華盛頓郵報》「報紙仔」，派過50幾萬份報紙，佢亦因為咁儲到人生第一筆錢投資。所以每年巴郡股東大會上都例牌有「掟報紙」比賽環節，但近兩年因為太多人參加，逼爆場而取消，絲絲依家終於可以靠玩Game回味吓。
睇番資料，股神目前旗下投資旗艦巴郡持股量2.55億股，佔總發行股本約5.55%，係Apple最大單一股東！佢喺Apple公布上季業績後，話會揸實唔放，唔會輕易賣走Apple，股神真係長情！
余絲韻