絲絲講場：美團王興：公司只是一副牌
身為一間上市企業嘅老細，除咗盤生意外，最緊張當然係公司股價啦！但香港第二隻同股不同權（WVR）股份美團點評（03690）嘅聯合創始人、董事長兼首席執行官王興就一於少理，講明唔關注公司短期股價。
事關上個月下旬，市場就確認咗WVR股份，將會喺七月份獲納入互聯互通，到時「北水」就可以買到美團嘅股份。受到消息帶動，美團股價算係好番啲，截至尋日收報嘅55.25元計算，喺過去一個月累升咗大約8%。
「唔理股價 踏實去做」
之不過，王興喺自己創辦嘅社交網站「飯否」上就話，有前輩同佢講「公司上完市，就應該踏踏實實咁專心做業務，着眼長期，唔好太過關注短期股價波動。」仲形容「股市好似賭博遊戲咁，公司唔係開賭場，亦都唔係莊家，甚至連玩家都唔係，只係玩家手裏頭嘅啤牌咋」。
嗱！美團係咪一副好牌呢，絲絲就唔知喇，不過對於以美團上市嗰陣嘅招股價69元，認購咗公司股份嘅投資者而言，家陣就仲未返到家鄉囉。
余絲韻