絲絲講場：國產整容股連日爆升納市放閃

國產醫學美容平台新氧科技（美股：SY）日前響美國納斯達克上市，發表上述「整容論」嘅就係創辦人兼CEO金星。佢語重心長咁叫大家細心諗諗，其實整容會令成個世界更加公平。如果有一日整容成本非常低，技術非常發達，當每個男女都一樣可以整到個樣好靚，嗰陣時大家就會關注番內涵，咁未來世界唔係更加公平同美好咩？

其他人講呢個「整容論」可能唔夠說服力，但新氧周四正式登陸美國納市，金星做整容做到美國上市，唔到你唔服喇啩。新氧今次集資約1.7億美元（約14億港元），首掛股價表現認真靚仔，收報18.2美元，較招股價13.8美元升近32%，市值飆上24億美元。周五早段升6.59%，報19.4美元。

創辦人：家人都整過

而貴為內地第一隻赴美掛牌嘅「整容股」，金星爆畀絲絲聽，原來佢自己同屋企人都整過容。金星話：「我媽媽係整容醫生，姐姐對雙眼皮係媽媽親自操刀。」

佢仲講起，當佢決定投身整容呢行，就毫不猶豫地攞自己開刀，打瘦面針。「喺整容當中，瘦面針係小兒科嚟啫，好似家常便飯咁，但我第一次做嗰陣其實都緊張到死。」

打完瘦面針，唔知係咪瘦面效果太好令佢愛上整容呢行，金星之後仲打埋玻尿酸、埋線、植髮同試埋光電類項目。佢仲上網寫整容日記同大家開心Share，儲落47萬粉絲，絲絲真係要叫佢一聲「整容達人」！

余絲韻