絲絲講場：致豐冧伙記 返工唔使打卡
早前「996」（即朝九晚九工作六天）工作制掀起城中熱話，不過有間港資公司無打卡系統，公司員工都準時返工，到底有咩秘技？
工業電子元件及產品製造商致豐工業電子（01710）主席兼執行董事黎耀華尋日喺傳媒午宴上自爆，公司奉行「以人為本」方程式，相信只要對同事好，同事都會努力工作。過分要求只會適得其反，互相尊重先係王道！
形容員工為「拍檔」
佢仲話，有得準時收工，梗係要準時收啦，做嘢好辛苦！員工幫公司搵錢，係公司重要資產，正確啲唔可以用「員工」嚟形容，應該係「拍檔」或「同事」，大家齊齊拍住上，咁公司先有更好發展！
之不過，舊年廣東省上調最低工資，導致公司人工成本上漲。加上原材料價格因供應短缺而上升、去年初人民幣升值等因素影響，上年度毛利率按年跌5.2個百分點，至24.7%。
但黎耀華就大派定心丸，今年公司毛利率可以回復到合理水平。仲話公司視某間恒指成分股公司為「偶像」，因為嗰間公司毛利率連續九年錄得增長喎。究竟係邊間藍籌公司咁厲害？不如大家估吓！
余絲韻