絲絲講場：港交所董事勁加薪 小加力撐

主席史美倫袍金加五成

李小加解釋，港交所未來三年要做大事，所以要用薪酬吸引世界級能人。對於香港上市「同股不同權」（WVR）股票今年七月納入「滬港通」及「深港通」，佢話依家三大交易所都積極準備納入細節，有關細節已到後期階段。佢又透露，要不斷豐富港交所嘅結構性及衍生產品內容，未來幾星期會考慮推出新產品。

究竟人工要加幾多先至叫做世界級呢？嗱，主席史美倫袍金增加超過五成，由219萬元加到去330萬元；一眾非執行董事袍金都獲得上調超過16%，至每年85萬元。

至於加人工嘅標準，原來港交所聘請咗獨立顧問參考其他交易所嘅情況，發現港交所董事袍金水平遠遠落後，強調加薪之後先追上同業水平。

而且，唔係加咗袍金之後會增加工作量，而係因為多咗工作量先檢討袍金。事實上，舊年董事無論係開會次數或者工作時間都大增，仲要額外花時間參加不同嘅會議添。

董事們大幅加薪自然值得高興，其實睇番港交所年報，李小加舊年人工（包括薪金、花紅及以股份支付的酬金福利等）已經超過5,000萬元，係咪世界級嘅人工絲絲就唔知，但佢就真係「好世界」囉！

余絲韻