絲絲講場：中裕CEO為環保轉食齋
中裕燃氣（03633）舊年燃氣銷售額同接駁收益大增，原因係公司期內「煤改氣」新增接駁客量飆3倍。中裕行政總裁呂小強（Daniel）話，「煤改氣」改善咗內地空氣質素，更加話受「煤改氣」感召今年開始轉食素！究竟「煤改氣」同食齋有咩關係呢？
佢話，內地鄉鎮居民「煤改氣」先頭得小貓三四隻，但無幾耐隔籬左右就會自發搵中裕做「煤改氣」，關鍵係每個人願意行出一步，燒少啲煤取暖，環境就愈嚟愈好。
Daniel為改善環境亦決定行多一步，就係轉食素！佢話自己原本係食肉獸，改食齋頭一個禮拜唔多唔少有啲心癮，不過堅持多陣依家已經適應。
今年料投放5億併購
被問到唔食肉有無減磅呢？Daniel話暫時無，可能係近排忙少咗跑步。唔通佢係忙住睇併購項目？事關佢話內地全新燃氣項目已經無乜，但併購空間唔細。
另方面，中裕投資者關係經理邱天預計，今年投放4億至5億元人仔做併購（唔包括今年一月宣布收購嗰兩間燃氣公司），同時撥5億至6億人仔做管道建設，如建設中高壓燃氣管道。Daniel強調，中裕搞併購一定要係啲能夠即時產生盈利同現金流嘅項目。
講番轉頭，中裕期望今年燃氣銷量增長三成，新增接駁住宅用戶70萬戶，「煤改氣」增長45萬戶，其餘增長25萬戶，比例和速度同舊年差唔多。市場關注中國石油（00857）準備調高夏季內地多個省份嘅非居民氣價20%，Daniel相信咁加法會衝擊中國成個燃氣行業，應該未必加到咁多。
余絲韻