Market Insight：藥股買龍頭長遠勝一籌

講開又講，中港股市自年初至今反覆向上，主力都係炒貨幣政策轉鬆，市場錢多股市自然有運行。雖然早前美國長短債孳息倒掛，令投資者憂慮環球經濟衰退風險升溫，但呢幾日後市場擔憂開始紓緩，始終就算真係出現，都唔係即刻殺埋身，故見美股重新發力亦非無因。

相對地，正如古勝所講，資金近幾個月炒作港股主要係睇「勢」，無論大戶定散戶都係望住邊類板塊或個股有錢進駐就順勢跟上車，反而市場上真係認認真真去分析板塊基本因素的投資者唔多。不過，所謂「有智慧不如趁勢」，如果贏到錢，就係好方法！

友邦具備指標作用

港股昨日喺29,800點前止步，重磅股都係反覆為主。騰訊（00700）、建行（00939）、中移（00941）及港交所（00388）等均微升，多少反映市場喺缺乏消息下有係幾悶。

值得留意的是，港股即市高低位分別為29,736點及29,534點，同上周中段幾個交易日一樣，全日波幅大部分時間都係十一點前行晒。這個趨勢會唔會延續落去，對炒即日鮮炒家有一定參考價值。

近期大藍籌普遍唔多有力，唯獨友邦保險（01299）就愈升愈有，三月份整固一輪後，昨日就抽穿80元，即市高見80.8元，最終升1.1%報80元。由於資金無其他選擇下，隨時都係搵番佢做撐住大市，短線可續留意友邦走勢，作為洞察市場投資氣氛之指標。

另外，昨日部分醫藥股跑贏大市，東陽光藥（01558）升9.6%、神威藥業（02877）升4.8%、四環醫藥（00460）升3.1%，較大晒士的石藥集團（01093）及華潤醫藥（03320）則升0.2%及1.8%。

內地人口老化問題嚴重，對醫藥需求有增無減，本來板塊前景唔錯，可惜去年又爆出假疫苗事件，令中央嚴厲整頓醫藥市場，加上國務院亦已印發藥品集中採購和使用試點方案，此政策一度被視為會令醫藥企業盈利前景大受影響。其後市場認為政策雖令企業中標價下調，但長遠卻有助行業汰弱留強，並對規模較大的醫藥股有利。

兩大藍籌逢低吸納

查實近期醫藥股去年度業績表現唔錯，石藥多賺32%至36.55億元，中國生物製藥（01177）全年純利更按年大增3.16倍至90.46億元人民幣；東陽光藥去年純利亦按年升46%。在佳績支持下，自然吸引到資金流入。

策略上，繼續「揀大唔揀細」，石藥及中生製藥股價自年初至今雖累升32%及40%，高追值博率唔算多，惟考慮到資金若再押注醫藥股，相信亦會以呢兩大藍籌作目標，所以仍值得逢低吸納睇中長線，最多以20天線作為止蝕。

古勝