絲絲講場：港交所驚現「伊波拉病毒」
尋日有兩隻新股首日上市，但居然有公司送「伊波拉病毒」畀香港交易所（00388），想嚇死人咩，睇嚟呢份紀念品很可能係港交所歷來收到最驚嚇嘅一份囉！
康希諾首掛 每手賺$2540
絲絲講緊嘅係本港第七間未有盈利生物科技股份康希諾生物（06185），皆因公司研發重組伊波拉病毒疫苗而一舉成名。呢個嚇人嘅病毒模型代表住公司發展里程碑，仲成功「谷」起公司股價，尋日收報34.7元，較招股價22元升57%，帶挈投資者每手200股計，帳賺2,540元！
雖謂喜事百無禁忌，但送「病毒」始終唔太好啦，唔通因為咁，港交所行政總裁李小加尋日只係出席同場另一隻新股中國線上教育提供商新東方在綫（01797）嘅祝酒儀式？原來唔係！話說小加只預咗現身影相，但因為環節超時，到場時咁啱新東方在綫進行緊祝酒儀式，所以上埋台祝酒，事後都有同兩間公司代表影相留念，絕唔會偏心！
新東方在綫都好有心思，送咗公司吉祥物「鳥小立」畀港交所，正面只係普通一幅畫，但打側少少睇，就有「真‧立體」效果。鳥小方衝出鳥巢，意味住成長、振翅高飛，但公司股價就飛唔起，收報10.2元，同招股價一樣。
余絲韻