Market Insight：5G概念股伺機翻兜

咁恒指跌後有冇得反彈，好視乎資金對後市睇法，而純睇牌面，港股市底轉弱似無懸念，持重倉者應先行減磅為上。

五大內銀排隊放榜

睇番重磅股，上周騰訊控股（00700）同中國移動（00941）公布的業績都不如人意，股價自然易跌難升，中移更有要錢唔要貨的迹象，短短兩個交易日自87.7元跌到最低見80.05元，以一隻大藍籌而言都幾過分！

值得留意的是，喺本周季結前仲有一眾內銀股派發成績表，周三先由建設銀行（00939）打頭陣，周四到工商銀行（01398），農業銀行（01288）、交通銀行（03328）及中國銀行（03988）則周五公布業績，對後市表現將起關鍵作用。

當然，中美貿易談判仍是主導港股後市關鍵，家陣睇落中美雙方在細節問題如知識產權上暫難達成共識，如果一路都係得個拖字，恐「遲則生變」。今年第一季升得好正路的港股，隨時急回番一二千點都唔出奇，大家要做好心理準備及風險管理。

面對市況波動加劇，現時策略除減磅外，市場又有否好選擇呢？事實上，部分受貿戰影響較微，行業發展前景穩定的板塊，值得做定功課，搵番個靚低位收集作中線部署，而古勝就依然看好早前整固一輪的5G概念股。

從基本面睇，今年為內地5G發展大年，於下半年將有5G手機出台。此外，歐洲各國未來仲聽唔聽美國支笛，齊齊打擊中國5G相關技術發展亦成關鍵。事關德國最大電訊商早前估計，若華為被禁參與當地5G網絡建設，其推出5G的時間恐被押後兩年，且會招致數以十億計歐元的額外成本。

炒股不炒市最實際

既然歐洲政府有自身利益的考慮，未來內地5G項目在歐洲之發展前景仍未須太過悲觀。早前中國鐵塔（00788）、中興通訊（00763）、中國通信服務（00552）、長飛光纖光纜（06869）以及京信通信（02342）等皆已率先調整，短期若隨大市進一步向下，估值變得更具吸引力。值得逢低吸納，當中建議以人氣較旺的鐵塔及中興作為穩膽，前者勝在穩陣，後者就博跌得深時彈得快。

另外，港股中長線前景未明下，繼續炒股不炒市，順勢進熱門板塊贏面反而更大。好似早前提過的物業管理股，睇落依舊有運行，新股奧園健康生活（03662）持續攀升，而中海物業（02669）上周五亦創出新高；至於碧桂園服務（06098）及彩生活（01778）則微升1.4%及1.3%，牌面上板塊保持住不俗人氣，有信心唔怕小注短炒。

古勝