中美貿易談判雖進入最後階段，惟雙方還在討價還價當中，更傳出中方未必在多個貿易領域中再讓步，難免影響市場氣氛。恒指破位後亦明顯無力再上，昨日跌145點報29,320點，主板成交1,031億元。
純睇牌面，騰訊今日公布業績，即市觀望氣氛濃厚機會幾大，若單看技術面，只要唔穿番29,000點及29,200點兩大支持位，相信後市大跌機會唔大，始終中美幣策齊齊寬鬆，市場水頭充足，股市自然有支持。
雖然資金輪流炒作不同板塊，但部分行業贏面相對較細。好似新經濟股就係一例，繼閱文集團（00772）周一公布業績後僅抽升過一段就反覆向下，昨日就輪到隻小米（01810）被沽，股價跌4.5%。小米去年業績雖然「虧轉盈」，但去年第四季收入低過預期，投資者看法較為參差。
其實港股自年初開始反覆向上，部分落後板塊如醫藥股及核電股近期都有追落後之勢，新經濟股始終不是市場熱炒主題，就算業績不俗，炒作都好短癮，所以有錢都要識揀股先好落場。
另外，古勝留意到物業管理股公布業績後均獲追捧，如中海物業（02669）、碧桂園服務（06098）、雅生活（03319）去年全年分別多賺31%、1.3倍及1.8倍，加上周一上市的奧園健康生活（03662）持續做好，資金對板塊看法幾樂觀。
從基本面睇，隨着對住屋環境及生活水平提升，令物管行業大有需求，加上收入基礎穩定，故較易吸引資金流入。走勢上，中海物業昨日股價走勢破腳穿頭，值得順勢跟進，目標價睇3.4元，跌穿10天線約2.94元止蝕。
雅生活亦破位而上，只要守穩13元仍具吸納價值，穿位止蝕。進取者可吼新股奧園健康，喺未有蟹貨下，向上動力較強，惟建議買入後股價若跌一成宜止蝕。
古勝