絲絲講場：「米粉」轟新機無貨 嗌雷軍落廠扭螺絲
小米集團（01810）新款手機「小米9」系列原訂上星期五（十五日）推售，點知臨開售前先話因為供貨量不足要延遲，引起一眾「米粉」極度不滿。尋日親臨香港主持記招嘅董事長雷軍話，有唔少網民叫佢同總裁林斌「唔好返工，去工廠扭螺絲」，意思係希望可以加快出貨！
雷軍解釋，延遲發售係因為需求遠超預期，絕非搞飢餓營銷；仲話小米唔係房地產發展商，手機生產商唔會儲貨唔賣。佢承諾今個月底小米9系列手機出貨量會有150萬部，仲強調絕對係國際品牌水準。
十億元賭局未認輸
講開又講，雷軍同格力電器董事長董明珠喺一三年底曾經訂下「10億賭局」，按照格力早前發盈喜推算，舊年總營收約2,000億至2,010億元（人民幣‧下同），淨利潤260億至270億元，咁咪多過小米同期嘅總營收1,749億元，同埋淨利潤逾135億元，睇怕都大局已定，小米準備好銀両找數未？雷總就話，點都等埋正式財報先！
之不過，大行就睇淡小米前景，大摩更調低小米目標價25%，由20港元降至15港元。報告話，小米嘅股價將會受到手機需求疲弱，同宏觀不利環境拖累廣告收入所影響，但維持小米「增持」評級，相信如果多元化策略見效，互聯網業務長遠將發揮潛力。
花旗報告亦指，小米第四季收入較預期差，因應出貨量同每月每戶平均收入（ARPU）下跌，將今、明兩年盈測調低，目標價仲由16港元，降至15港元，但評級就維持「買入」。
小米股價尋日收報11.64港元，跌4.59%。
余絲韻