Market Insight：水泥股短線冇運行

古勝一向認為「錯就要認，打就企定」，無論係做人抑或投資都適用。早前見恒指無氣無力，部分強勢板塊又回軟，故選擇且戰且走，未有建議大手押注重磅股，結果就跑輸大市。不過，投資係計大圍數，唔需要因為一兩次挫敗就失信心，只要努力做好選股功課，最終亦可成為贏家！

華潤置地候低吸納

睇番恒指幅日線圖，若以一八年歷史高位33,484點跌到落十月低位24,540點計，其實年內已先後上破反彈調整幅度之黃金比率0.236、0.382及0.5，即分別約26,651點、27,957點及29,012點阻力，下站就要挑戰0.618約30,067點。

由於此位正值三萬點關水平，且亦貼近去年三至六月橫行區底部位置，係咪話咁易就能成功闖關，真係要拭目以待。

論及昨日最亮眼板塊，非內房莫屬。市場主要炒作海南省重啟「商轉公」房貸，以及內地穩經濟下，憧憬人行年內進一步降準減息。三大內房藍籌中國海外（00688）、華潤置地（01109）及剛公布業績的碧桂園（02007）升幅介乎3.3至9%。至於二三線內房同樣標青，雅居樂（03383）升10.7%，融創中國（01918）升6.8%，富力地產（02777）升4.5%。

策略上，由於今轉內房股主要炒國策變動，相信大型內房的受惠程度較高，加上規模大以及財政實力亦較強，所以如果要追貨，必然係揀大唔揀細。當中在下較為看好潤地，昨日股價已上破營造了三個幾月的橫行區阻力，相信唔會炒得一日咁短癮，值得候低於32至33元吸納，目標價36元，止蝕位30.8元。

仍須審視行業政策

相對地，以往時不時拍住內房股做好的水泥股，今期就認真唔好彩，行業負面消息不少，如發改委擬調研水泥定價、北京市要求工地禁用袋裝水泥、唐山市數十間水泥廠緊急停產應對減排措施，引致水泥股昨日全面捱沽。

大行瑞信就指，消息或限制次季水泥需求高峰期之潛在價格升幅，但考慮到產品需求彈性及潛在新增產能有限下，預期價格不會大跌。始終真金白銀向來係最現實，既然消息不利短線氣氛，資金都選擇先沽為敬。昨日海螺水泥（00914）、華潤水泥（01313）、金隅集團（02009）及中國建材（03323）跌幅介乎1.7至4.1%，短線相信可放埋一邊，至於中長線買唔買得過，就要睇往後政策會否再轉向。

古勝