絲絲講場：證監魏建新勢續約打老虎
香港證監會前日嚴打保薦人違規，轟動全城。「打虎英雄」證監會法規執行部執行董事魏建新居功不小。唔講唔知，原來魏建新今年五月二日就任期屆滿，市傳有關方面已同佢傾緊續約三年。
職位未見公開招聘
呢啲咁重要職位，請人係超困難，如當事人唔續約或退休，證監會一般會預早幾個月公開招聘。但尋日為止都未見到證監作公開招聘，市場預期魏建新續約機會好高。
絲絲亦就魏建新續約一事查詢，財經事務及庫務局發言人就不作評論。
講番魏建新，佢一六年五月來港接替上一手「打虎英雄」施衛民，另外佢亦有Bull Dog（鬥牛犬）綽號，即係性格好適合做強硬嘅執法者。魏建新仲曾經公開講，話發現多個由公司網絡組成嘅「邪惡集團」，因而證監會啟動有史以來最大規模嘅搜查行動。佢早前更預告，企業欺詐對本港構成最大威脅，目標係今年上半年向約60家公司同個人提出法律程序。大家等睇「好戲」！
余絲韻