絲絲講場：公牛插座上市阮氏兄弟發達
內地大部分家庭用嘅充電插座，都係公牛呢個品牌，但唔好睇小呢個插座，佢為公牛集團每個月淨賺逾億元（人民幣‧下同），公司仲喺上海交易所申請埋上市，絕對係一門大生意！
申A股掛牌籌48億
舊年九月，公牛已經對外公布咗向中證監申請上市嘅招股書，而有關申請正係審批當中。按招股書申報，呢次擬發行唔超過6,000萬股，佔發行後總股本不低於10%，計劃集資48.86億元。
如果成功上市，以公牛原股東持股總數5.4億股計，公司估值約440億元，而創始人阮立平同阮學平兩兄弟佔集團95.876%股份，兩人身家會升至422億元。公司近日被同業通領科技入禀法院控告專利侵權，索賠近10億元，唔知有無影響？
講番公牛插座嘅誕生，喺八十年代末，阮氏兄弟家鄉浙江慈溪發展成全國有名嘅插座生產基地，好多親戚朋友都加入呢行。但佢哋無錢投資生產，推銷時亦障礙重重。九五年時，阮立平創立公牛插座。佢話：「當時喜歡打籃球，美國NBA聯賽中，芝加哥公牛隊是最厲害，公牛的名字是從這裏來！」
余絲韻