絲絲講場：首灃公子接棒 靠終身大事
人人都收過「紅色炸彈」，大家去飲嗰陣都會八卦吓場地有乜特別。首灃控股（01703）旗下婚宴專門店「煌府」酒樓出名多花臣，飛天馬車、Catwalk天橋等都係集團主席陳首銘諗出嚟！
陳首銘：等Surprise
據絲絲所知，陳總嘅大仔陳泉凱都到咗適婚年齡，唔知陳總會幫個仔嘅婚禮使出咩花臣呢？陳總就耍手擰頭話，「佢娶老婆梗係要自己諗啲Surprise，都等佢Surprise吓我」，仲相信仔仔會青出於藍咁話。
陳泉凱依家28歲，任職集團經理，主要負責樓面管理工作。佢同絲絲透露，雖然自己唔係負責婚宴工作，但都有唔少Idea o架！係咩？秘密喎！明嘅，話明Surprise嘛，講咗就無驚喜。
雖然陳泉凱現時仲未加入公司董事會，但佢話好有信心可以得到管理層信任，隨時準備接棒。唔知佢結婚嗰陣，會點樣自己度番場絕世婚宴，當做父親畀佢嘅接棒考驗呢？
余絲韻