絲絲講場：千元瑞郎新鈔炒唔起
全球價值第二高鈔票、1,000瑞士法郎嘅新版今日（五日）面世，其面值約等於7,846港元，僅次於1萬新加坡元同1萬汶萊元，呢兩種鈔票嘅面值相當於約5.7萬港元。
當全世界都提倡電子貨幣，減輕假鈔問題，只有瑞士反其道而行，據悉，當地現鈔流通率係全世界第二，僅次於日本。不過，瑞郎嘅防偽技術確係世界第一，想偽造冇咁易！據各地央行統計，瑞郎被偽造嘅可能遠低於歐元、美元或英鎊。10萬張瑞郎紙幣中，只出現1張係偽造，而歐元嘅比例係2萬張有1張；美元1萬張就有1張；英鎊每3,333張中有1張係假嘅！
亞洲收藏家料佔少數
呢張千元瑞郎鈔票可以話係絕對有需求，事關瑞士市民唔相信銀行，加上當地物價之高係全球數一數二，市民出街買嘢都使慣大紙，閒閒哋都袋住張1,000瑞郎，就算買車以至買樓都慣咗用一疊銀紙找數。
香港真藏負責人張頌昇就話，新鈔票炒賣熱潮通常維持約一個月，大多數買家都主攻重疊式號碼嘅鈔票，好似「111111」等，而西方買家更相信「lucky 7」。佢預計，今次炒賣瑞郎新鈔嘅亞洲買家只佔少數，大多以自己收藏為目的。
不過，就算冇得炒，新版1,000瑞郎設計上去人像化，並加入更多新花樣元素，面值又咁大，方便高消費人外，現鈔儲蓄都唔使咁大個夾萬阻地方啦。
余絲韻