絲絲講場：債王格羅斯自爆有病

74歲嘅「債王」格羅斯（Bill Gross）三月一日起退休，結束近半世紀嘅債券投資生涯。臨別秋波，佢接受外媒訪問時突然自爆患有亞氏保加症（Asperger's Syndrome），亦即自閉症嘅一種。

債王雖然早年已被診斷患有呢個病，但佢一直守口如瓶，即使最親密嘅朋友都唔知，依家係第一次公開。

至於亞氏保加症患者，債王話會識得分隔自己同其他人，令佢可以長時間專注，唔會混淆細節，成為更佳嘅投資者，但同時脾氣亦好暴躁。事實上，有好多亞氏保加症患者智商偏高，仲具有某方面嘅天賦。

至於債王點發現自己有自閉症，原來係佢睇完本講述○七、○八年國際金融危機嘅書籍「The Big Short」，故事主角係一位對沖基金管理人，擁有唔尋常嘅特徵同品格，都同債王好似，而主角就係患有亞氏保加症。於是債王就去睇精神科醫生，結果確認病情。

余絲韻