絲絲講場：投行靠科學家擔大旗

該公司董事總經理兼醫療與生命科技投行業務負責人謝屹璟自爆，佢主理嘅團隊當中，有好多都係科學家嚟！點解？事關近年內地好多未有盈利嘅生物科技公司處於第一個發展周期，亦有融資需要，而生物科技行業同其他行業係截然不同，一啲都唔簡單。佢仲話，「不懂的不要投，要投的話，投你懂的」。

又啱嘅，正所謂「外行人管內行人係大災難」，要做好呢個板塊，唔怪得要有科學家啦！不過華興呢招又幾掂咁，癌症免疫治療開發商TCR2Therapeutics今個月十四日喺美國納斯達克上市，華興就幫佢哋做上市嘅聯席經辦人。

華興力攻生科企上市

查實去年本港第二隻未有盈利生物科技股百濟神州（06160）及內地A股獨角獸藥企藥明康德（02359）上市時，華興都好幫得手，分別擔任聯席牽頭經辦人及聯席帳簿管理人。

不過，如果要數華興做過最出名嗰幾單Deal，一定係一四年協助內地電商京東赴美納指上市；一五年幫美團同大眾點評搞合併，變身成依家嘅美團點評（03690），仲做埋美團點評去年嚟港上市時獨家財務顧問添！

余絲韻