絲絲講場：美團王慧文：「上市似奉子成婚」

話說，早前王慧文喺內地創新大會上，被問到點解美團點評主席王興當日上市慶功酒會上，除講咗十三四個「感謝」外，冇乜發表感言，係咪Hea咗啲。

王慧文答話，除咗講多謝，都冇乜特別值得講，仲話公司上市，「就像奉子成婚一樣，你該辦的都幹了，最後走一個流程就可以了。」

真係咁平淡簡單？未必，佢講講吓，就提到當初諗住搞上市同以往私募融資差唔多，點知上市做Roadshow時先發現，每家投資者只畀得佢哋一個鐘，一個業務都未講完，已經夠鐘，而每一家投資嘅額度又唔多。

推下屬陷絕望助開竅

講到管理，王慧文話有擔當嘅管理者一個重要責任，就係將下屬由愚昧之巔，推落絕望之谷，至於對方能否爬上開悟之坡，睇個人造化。佢仲話，大部分人只見別人喺愚昧之巔，而睇唔到自己情況亦係一樣。

佢仲提到，曾經有下屬離職，王慧文覺得對方嗰時就正正喺愚昧之巔，於是喺對方臨走前一刻，王慧文本住「人之將走，其言也善」，就狠狠醒對方幾句。結果？反晒面囉。

佢呢套管理哲學到底師承自邊家？唔知呢，不過佢話，講到企業管理大師，首推Peter Drucker咁話喎。

余絲韻